Mathesius 1562

Johann Mathesius, Sarepta Oder Bergpostill Sampt der Jochimßthalischen kurzen Chroniken, Nürnberg 1562.

Die VI. Predig

Die sechste Berkpredigt/ Vom
Silber/ und den Sprüchen/ so in der Schütte
von Silber lauten.

. . .

Was aber die andern ertz sein / da nichts sichtiges oder kendtlichs von gediegem silber an ist/ die brechen auch bis weylen ganghafftig/ biß weylen niericht/ biß weylen estig /inn allerley Bergkart/ Wenn die ertz frisch sein/ hat man besser hoffnung/es werde sich nicht so balde abschneyden.

Offt bricht ertz in eim glantz/ kobalt/ wießmut/ kieß/ quartz / spath/ schiefer/ bornstein/ schiefer grün/ bleyschweyss/ in ein glock speissige art/ inn eim letten/greuß/ silbe/ welches die Raurieser schmillen/ und Plinius Sil/ und die Maler ocher oder obergehl nennen. Item in weissen unnd roten zinck/ und in Ungerischen gelff/ welcher eim bleichen ließ schier ehnlich sihet. Von diesen arten oder farben bekommen sie jren namen/ ein schwartz/ braun/ leberfarb/ graw/ ascherfarb ertz/ was specklicht/ oder grün unnd gelbe art ist/ die silber helt/ nennet man nach dem Genf oder Zeif koth. Offt bricht es auch in Lasur/ wie zu Schwarz/ unnd biß weyl auff der plan/ unnd inn einer eyssenschissigen art/ inn eim gemülbe/ zumal inn drusen.

Die IX. Predig

Die neundte Predig/ Vom Zyn/
Bley, Glet/ Wismut und Spießglaß/ und den
Sprüchen/ so in der heyligen schrifft hievon lauten.

. . .

fol. CXLI^v–CXLIII^r

Nun kommen wir zum Wismut/ welches die heutigen Lateiner ascherfarb bley nennen/ Denn die alten Grecken und Römer/ haben nichts vom Wismut gewist.

Es haltens etliche dafür/ weyl Wismut seine blut/ unnd mancherley farben hat/ wenn es in zechen ausschlecht/ und sihet weiß/ braun/ rot/ gesprencklich durcheinander/ es habens die alten Bergkleut Wismut genennet/ das es blüet wie ein schöne wien/ darauff allerley farben blumen stehen/ denn erstlich hat man nur die Wismatblüet kennet/ darnach hat man es auch lernen schmeltzen/ Solch wismat bricht offt ganghafftig in mancherley bergkart/ offt ist es auch gar gedigen/ bißweilen helt er auch silber/ Die Bergkleut nennen es des erzes dach/ drumb das gern silber hernach bricht.

Wenn man ein wismat stuffe ins fewer legt/ pfeiffet/ offt treufft auch der wismat von stund an herauß.

Denn weil diß gifftig metal viel quecksilbers bey sich hat/ ist es sehr flüssig und flüchtig im fewer/ Da es unters ertz bricht/ gehet es alles im fewer hinweg/ unnd macht sehr ein gifftigen hüttrauch/ Wenn man es allein unterm Himel im freyen felde unnd offnen windtoffen schmeltzet/ gibt es gar ein schedlichen rauch von sich/ unnd fleust balde/ wie ich auch ein gedigen wismat gesehen/ der von der natürlichen hitz und operation in der gruben geflossen ist.

In fesseln da er auch schon gepocht ist/ wechst oder süntert er wider zusamen/ das er auch die fesselein zutreibet.

Es wöllen Bergkleut sagen/ das sie wismat auff die halle gestürzt/ der kein euglein silber gehalten/ darinn man hernach uber etliche Jar silber gefunden/ wie wir auch im anfang gemeldet/ das die natürliche wirckung den wismat in silber verwandlen solle/ zumal inn unuerschroten feldern/ da es seine narung vom schwebel unnd quecksilber oder fetten dunsten habe.

Kandengiesser setzen es unters zyn/ wenn sie gehemerte schüsseln oder teller machen/ denn die geschirr werden herter und stercker/ und geben ein klang von sich/ Sonst braucht man es zu Meilendischer arbeyt/ welche man conterfey nennet/ und die Buchdrucker giessen jre buchstaben drauß/ mit spießglaß vermenget.

Am meisten aber braucht man es zu farben/ darmit man die büchslein unnd hültzerne geschütz ferbet/ Denn man brennet ein schöne blawe farbe aus wismut graupen/ die etwan vil geldes gegolten/ solche nennen die Töpffer/ saffran farb/ wie auch aus andern metallen allerley farb gebrennet werden.

Es bricht ein schwertz aufm Küttenberg/ gibt den töpffern schwertzlichte oder breunlichte farbe/ daraus die mostkrüglein gemacht werden/ Eis so gibt gelbe farbe/ wie glantz pleyerzt/ unnd glet/ etlicher gibet auch grüne farb/ bley und quecksilber gibt den Malern mennig/ und zynober wie ochra sil oder obergelb/ gelbfarb.

Die glasköpff von der platten geben kesselbraun/ kupffer gibt auch grüne farb/ hamerschlag gelb und rot.

Mennige sandt und Spießglaß/ gibt goldgelb/ Elbogner weyssen sandt/ machet weysse kacheln/ Küttenberg gibt silberweiß/ Umbs Jechhauf/ nicht fern von Neydeck/ bricht auch braunsteyn der farbe gibt.

Denn etliche farben grebt man aus der erden/ als o rot Lazur/ braunsteyn/ ochergelb/ operment/ damit die Buchbinder die bücher aussn schnit gelb machen/ Sandaraca welchs man bergröt nennet/ Jtem die Synopische rubriken/ der im Ezechiele gedacht wirt/ welches ein natürliche mennige ist/ den was unser mennige und Cynober/ so man aus quecksilber macht/ damit sich die Römer anstriche/ betrifft/ wölle wir gedencken/ wenn wir vom quecksilber erzt reden werden/ daruon villeycht das minium sein namen hat/ weyl mini auff hebreisch Mercurius heisset.

Etliche farbe macht man aus Kupffer/ so man die selbigen peysset/ etliche bzendt man aus geschmeltzten Metallen/ oder aus schönen bergarten/ Ein gut rote farb/ so sich auffs glaß aufftragen ließ wie plaw/ hat man noch in den Landen nicht finden können/ Die schönen schmeltzglaß oder riztkle/ damit die Goldschmid die wappensteyn ferben/ bringt man aus dem Niderland.

Diß hab ich hie auch von wismat/ und warzu man jn braucht/ kürtzlich anzeygen wöllen.

Nun kommen wir zum bley/ welches die heylige sprach opheres nennet/ das sonst staub oder ein mollete erde heyst/ darumb das man bley offtmals aus der erden oder sand macht/ oder das man das bley körnen/ und zum aller kleinesten sandt machen kan/ wenn man es trifftert/ oder schwinget in einem trog/ weil es noch heyß ist/ Wie die Venedischen sand-seygerlein ein bleyen sand haben/ der nicht feuchtigkeit in der verenderung des weters annimbt/ oder schwindet auch nicht in der hitze/ Da es feucht ligt als in fenstern/ und auff den dechern/ wil man sagen/ es sol wachssen und zunemen.

Es berichten mich aber die bleyhendler/ das das bley in fenstern/ dechern/ und pflastern wol schwerer werde vom unflat/ so sich dran henget/ aber im fewr finde man das alte gewicht nicht wider.

Solch bley bricht auch ganghafftig/ im glantz und bleischweiff/ wie zu Freyberg und bey uns etwan auff der bleyzech am Türckner/ und helt silber darneben/ da man mehr bley aus bringt den man fürgeschlagen hat/ Sonst hat es seine eygene stöcke/ wie zu Goslar/ da der gantze Ramelsberg zu preyten Plick fast halb bley ist/ der centner helt in acht lot silber/ man kan es aber nicht gar herauß bringen/ drumb man Goslar bley lieber hat denn Englisch und Polnisch/ Villacher bley sol gar kein silber halten/ drumb da man scharpff und gewiß proben machen wil/ brauchet man Villacher/ doch so man 3. oder 4. probier zentner auffsetzt/ sol sich ein bleykörnlein finden.

Das bley vom Tanzblatz oder Tanzfleck in der Pfaltz/ ist das geschmeydigste und weichste.

Bleyertz erbeit man nur uber die rohe schicht/ was silber helt/ das treibt man wie die werck.

Dis metals kan man zum schmeltzen nicht gerathen/ denn der steyn nimet das silber vom ertz/ vom steyn sticht man es ins bley/ Denn wie zwischen gold und quecksilber ein natürliche verwandnuß ist/ also auch zwischen bley und silber/ quecksilber welchs weych silber ist/ wirdt vom gold gequickt/ oder es verzaucht im sewer/ Also treibt man auch das bley/ vom silber durchs fewer/ da es im rauch wegt gehet/ und macht ein sehr gifftigen und gehlen bleyrauch/ der sehr lehmet/ oder es strecket sich inn treibherd/ welches hernach wider angefrischt/ und den erzen oder schlacken fürgeschlagen wirdt/ oder es fleust aus dem treibherd/ und wirt glet oder silberstein/ wie es die Grecken nennen/ welchs man den ertzen zusetzet/ oder wider anfrischt/ oder die töpffer verglaisirn jre geschirz darmit/ wo sie nicht bleyertz oder glantz haben/ oder man brauchet es zur Erzney.

Glantz/ welches die Lateiner Galenam nennen/ ist ein glauch oder glun metal/ bricht gern auf silbergengen/ helt offt bley und silber/ offt ist es auch kupfferig/ da er nicht gar zu grob speisig und spissig ist/ weiß glasertz ist offt nicht wol von eim dunckeln glanz im ansehen zu kennen/ denn es springet auch wie ein glanz/ Was glauch oder sehr weiß ist/ hat nicht gerne metal in sich.

Man findet auch bleyerzt das rot ist/ wie eine rote glet/ oder thon/ und schwer ist/ wie es auch in einen weissen kalchsteyn weissen spat/ und weisse flöß bricht/ zu Goslar bricht es in ein blawen schiffer.

Bleischweiff oder plumbago ist ein gelblicht metal/ voller schwebels/ darumb es von bley und schweffel den namen haben sol/ oder das es des gangs schweyff ist/ Diß helt offt Bley und Silber/ drumb bawen Berckleute gerne auff gengen die ein schönen bleischweyff füren.

Die heylige Schrifft gedenckt offt des bleyes/ da man die Midianiter ausshaupterlegt/ beuten die Juden auch bley auß/ und auff die Messgen Tyro/ bracht man auch neben andern metallen vil bley/ Denn man braucht es zu allerley Instrumenten und gewichten/ wie wir oben gehört.

Schiffleut hatten ihre bolides bley oder bleywurff/ damit sie das Meere abmassen/ drumb spricht Mose von Pharaone und seinen Jundern/ sie suncken zu boden wie bley/ So machten die Werckmeyster jhr bley und bleyscheyd draus/ die sie an den gepeuden schiessen liessen/ unnd anschlugen/ damit sie jre mawern schnurrecht/ unnd im seyger aufffüreten/ und die wercktück grade versetzten/ und anzeyleten/ So gibet auch Zacharie Text Capitel 5. das sie Gewicht oder Centner draus gemachet haben/ Denn was der Prophet erstlich ein Centner bley nennet/ das heyst er bald hernach ein steyn bley/ oder ein bleyen gewicht/ welches ein klumpen bley verdeutzscht ist/ wir brauchen messing hülsen/ darein mã bley oder glockenspeyß geust/ damit sich die gewicht nicht abnützen/ und leychter werden.

Ir Bergkleut wenn jr mit bley umbgehet/ und hebt die grossen stück bley/ so erinnert euch des Propheten texts/ darin er die Ketzerey und falsche lehr mit einem grossen stück oder centner bley vergleicht.

. . .

Die X. Predig

Die zehend predigt/ von schlacken/
Kiß und Kobelt/ Ausz dem spruch Davids/ Psalmo 119.
Du wirffst alle Gottlose auff Erden weg wie Schlacken.

fol. CLI^v–CLVI^v

IM namen des Vaters/ Sones/ und heyligen Geistes/ Amen. Wir wollen heut diesen vers auf dem 119. Psalm erkleren/ Du wirffest alle Gottlose auff Erden weg wie Schlacken/ also können wir auch von Schlacken unnd etlichen tawben/ geringen und gifftigen Metallen unnd Bergkarten reden/ so in gengen/ fletzen/ in und bey Ertzen/ und in Hütten gefunden werden. Denn weil wir nun die gedigen und gültigen Metall verrichtet/ und unser Gott die Gottlosen/ und wie es mit jnen ein ende nimmet/ in Schlacken/ Kobelt/ Kiß/ und was der unartigen und leren Bergkarte mehr sein/ abmalet unnd fürstellet/ müssen wir Bergkleuten zur lehr unnd warnung/ auch diese gleichnuß erkleren/ damit jr euch an ewer sawren arbeit/ des gerechten zorns und gerichts Gottes/ zuerinnern habet/ und euch hütet/ das jr nicht tawbe Schlacken oder gifftiger Kobelt und Kiß werdet/ sondern bleibet rein und lauter goldt und silber/ wie euch Gott durch seines Sones Blut/ Tauff unnd Geist/ zu köstlichen handtsteinen wider gemachet und verordnet hat.

So behalt nun heut den spruch Davids/ Gott wirfft alle Gotlosen auff erden weg wie Schlacken/ Das ist/ wie ein Schmelzer die tauben und aufgepauschten schlacken wegstürzt/ oder inn wege lauffen lessett. Also wirdt der Son Gottes/ der verordnete Richter/ uber gute unnd böse/ die Gottlosen/ so nichts von Gott wissen/ oder von Gottes wort in jrem hertzen haben/ wegwerffen/ zumalmen/ unnd von seinem angesichte offt hie zeitlich/ und hernach in alle ewigkeit verstossen/ und unter seine und seiner gliedmassen füsse werffen/ do sie im hellischen fewer mit allen Teuffeln/ in alle ewigkeit gequelet werden.

Hie höret jr wie der heylige Geist die Gottlosen unnd jhr ende/ mit den silberlosen Schlacken vergleichet. Schlacken (wil David auff bergkaleufftige weise sagen) wenn sie offt durch den ofen gangen/ und uber die rohe schicht gar auffn todt gearbeit und rein aufgepauscht sein/ das nit ein euglein stein/ silber oder ander metal mehr drinnen ist/ da man sie auch gar zu melpocher oder melet/ solche taube schlacken pfleget man in wege zu lauffen/ wie die tawbe halle.

Gottlose verechter des Herrn Christi und seines Evangelij/ in den nit ein euglen von dem reinen Silber Gottes wort mehr ist/ und die nicht ein gleublein haben wie ein Senfftkörnlein/ da auch weder lieb noch lust/ hertz oder wille ist nach der warheit/ oder das sie begerten frömer oder selig zu werden. Solche glaublose leute wirdt der Richter alles fleisches von sich treiben/ und mit den bösen Geistern inn die eusserste finsternuß und das ewige hellische Fewer werffen.

Also vergleichet der heylige Geist silberlose Schlacken und Gottlose leut mit einander/ und malet der Gottlosen wesen unnd jr verdamnuß jnen für/ und offenbaret Gottes gerechten und ewigen zorn wider alles Gottloß wesen/ ungerechtigkeit/ sünd und schande/ und warnet yederman als ein trewer Gott/ vor Gottes grim und ernsten gerichte/ damit Gott und sein lieber Son/ in den tagen seines zorns unnd am Jüngsten tage entschuldiget sein/ wenn der last des grimmigen zorns Gottes/ die unbuffertigen unnd verruchten uberfallen/ unnd inn alle ewigkeit auff in bleiben wirdt.

Diß ist die summa dieses schrecklichen textes. Nun wöllen wir unser fürgelegten spruch oder Thema ordenlich für uns nemen/ und ein jedes wort mit fleiß erwegen/ so können wir richtig reden von schlacken/ und was in verwant ist/ und wanne sie kommen/ und wie man sie außpaucht und wegstürt/ darnach von verwerffung und verdamniß der unglaubigen/ so in dieser angenemen zeyt/ Gott und seines Sones Evangelion mutwillig aufgeschlagen/ und dem heiligen Geiste und seinem ampte/ und einraunen beharrlich widersprochen haben.

Schlacken heisset man bey den bergwercken/ alle unreinigkeit so von den gengen erzen oder gültigen metallen/ im schmelzofen abgehen oder abgezogen werden. Denn was in treibherdten von den wercken gescheiden wirdt/ das heißt man Glet oder Silberstein/ die Deutsche Bibel nennet es offt Silberschaum/ das es auff dem silber schwimmet/ wie ein gescht auffm bier/ oder schaum auffm wasser.

Bernkot so von den unreinen wercken kommet/ gehöret auch zum Schlacken/ So mancherley Metall aber/ so mancherley Schlacken. Unser silber und bleyschlacken sind graulicht und schwarzlicht/ daraus man auch schlackenbad machet/ die ligen zu öbrist auff dem spor/ wenn man gestochen hat.

Zihnschlacken sind schwerer und schwerger schier wie ein schwarzer Agstein/ Kupfferschlacken sind eins theils blaw/ die andern braun. Eysenschlacken sind voller sünters und wildigkeit. Die schlacken oder schaum so aussm Glaß schwimmet/ nennet man Glasgallen/ kommen vom sandt oder kislingen/ oder quertzen/ sind schneweiß und sehr flüssig drumb sie die Goltschmied und was beschickung machet/ dem silber gerne zuzusetzen/ damit dem silber deste weniger abgehe/ wie auch etliche glaßmehl auff die silber strewen/ und auff die Kupffer darein man Galmey brennen wil/ damit sie deste ehe schmelzen/ Und den Metallen im Fewre oder Tigel dest weniger abgehe.

In viel sprachen haben die schlacken jren namen/ entweder/ das es unrein/ trüb/ ler/ und falsch ding ist/ das man abscheide/ abziehe/ wegstürze und in wege lauffe/ wie thum und verdorben Salzt.

Die heilige sprach nennet sie Sig, drumb das sie durchs fewer vom Metal weichen/ wie sie die lateiner recremeta, oder reiectamenta heissen/ das sie von den ertzen abgeschieden und endlich weggeworffen werden. Die Grecken nennen sie Scorias, und füren diß wort vom Skor, das heist kot oder unflat/ daher man ein schlammigen tropffen oder ungewaschen maul/ der umbs bauchs willen/ garstige und lose possen reisset/ und mit schamparn unfletigen worten/ losen leuten ein frewd oder gelechter machen wil/ ein scurram und rechten Ertzunflat nennet.

Es lesset sich aber diß wort ansehen/ als sey es auch vsprüngklich Hebräisch/ und komme vom Scheker her/ welches in der heiligen sprach lügen/ eytel/ lehr und falsch ding heist. Denn die drey buchstaben so zur wurtzel gehören/ sindt unuerrückt im wort Scoria, so wil der nechste vers vor unserm texte schier gar hiemit einstimmen/ Denn der Prophet redet einerley ding mit abgewechselten worten/ und spricht erstlich schlecht und gerecht/ on alle verblindte rede oder gleichnussen. Gott zurtritt alle so seines wortes feilen/ den jr lehr wesen/ Gottsdienst/ wandel und leben/ ist lauter Scheker oder scoria, rechte lehre oder aufgepauschte schlacken/ darinn nichts gültigs oder gewiß ist/ das zu lauter nichte mehr dienet/ drumb wie man die schlacken wegstürzt/ also wird der Son Gottes die falsche lehrt und erdichte Gottesdienst/ sampt den Bößwichten und götzenschmiden/ von sich treyben und verwerffen/ ob sie auch unter dem schein des Euangelij jre lügen und ketzerey verkaufft hetten/ Matth. 7.

Also würde Scheker, scoria und Schlacken ein ding werden/ Man wolte denn Scheker lassen ein gemein wort bleiben/ damit man neñe alle lügen/ eytelkeit/ falsch und betrug/ so in der lehr und leben im Bergwerck und hendeln/ gespürt und getrieben wirdt/ wie zwar auch jr Bergkleut alle taube und lehre Bergkart und hallen/ falsch ding pfleget zu nennen/ das kein silber oder ander gültig Metall bey sich hat.

Sig aber were nun in sonderheit/ das man nach dem stich abzeucht/ oder von wercken abgetrieben wird/ oder im spor auff dem bley empor schwimmet/ oder andere abstrich/ so man wie ein andern Schaum von zerlasnen metallen abfeimet.

Denn was sich im ofen anhengt/ oder in der fewresse anlegt/ unnd von gebleß und fewrflammen uber sich gestossen wird/ hat man Cadmiam fornacum genennet/ unnd für ein gifftigen Cobalt gerechnet/ daruon wir hernach weiter reden wollen.

Von solchem schlacken/ unflat oder falschem dinge redet nun David in diesem Verß/ das gar eytel lehrt/ niemandt nütz/ vergeben und falsch ist/ oder das wir auch ein newes wort brauchen/ das gar silber oder Metal loß ist/ drinn kein euglein oder greuplein silberstein/ oder gut ding zu finden ist/ wie man vergebne und lose wort und leute/ glaublose und gottlose leut nennet/ darinn nichts wares/ bestendiges/ sonder lauter falsch/ erdicht heucheley und gleißnerey ist.

Ehe wir aber in unsern vorgelegten worten fortfaren/ und von eygenschafft der Gottlosen lehr und leute/ und von jrer verwerffung reden/ müssen wir hie auch meldung thun/ waraus die Schlacken werden/ denn also können wir zur volkommen beschreibung/ und zu den andern tawben unnd gifftigen Bergarten auch gelegner kommen.

Nun ist das gar gewiß/ das die Metal gar selten rein oder dicht brechen/ denn ob man wol gedigen Goldt/ silber/ kupffer/ Zihn und bley findet/ so bricht doch viel mehr Erz/ das gar viel unreinigkeit/ wildigkeit/ und falsch ding neben sich füret.

Unsere silber brechen gemeiniglich in Cobelt/ Kiß/ wismat/ glantz/ Glockenspeiß/ schwertze/ gilbe unnd andere Minerische arten/ die voller schwebel und sichtigs und unsichtigs quecksilbers sein/ so muß man den Erzen nach gelegenheit jrer Compler/ oder temperatur/ allerley zusatz geben/ damit sie mit glantz/ schlacken/ glet/ flössen/ Kupffer und frischem und angefrischtem bley flüssiger/ und mit kiß unnd stein im ofen/ unnd durchs bley im spor gescheiden werden. Wie man denn sihet/ das durchsaugt silber und bley durcheinander/ darnach stein und speyse/ und letzlich die schlacken fliessen. Item das viel wildigkeit so im fewer durch den stein nicht gar hat können geweldiget oder gemeistert werden/ sich in die Schlacken schmiret/ und innen im Ofen und drüber anleget.

Auß demselben wilden/ lähren/ schweblichten/ speisichten und gifftigen bergkarten/ so unzelich mit unnd neben die genge unter das Erze brechen/ werden endtlich die tauben und metallosen schlacken/ wenn sie zumal offt durchgesetzt/ gepocht/ gemalen/ gewaschen unnd gar auff den todt durch die rohe schicht gearbeit werden.

Denn wie der Son Gottes am Jüngsten tage/ die guten von den bösen im letzten fewer scheiden/ und die reudigen Schaf und Böcke/ von seinen Scheflein aufheben oder ausmerzen wirdt/ also scheidet sich im natürlichen fewer und starcken gebleß/ das gute Metal von den gifitigen/ zehen/ speisigen/ heiß gretigen/ tawben/ leren und vergebnen bergarten.

In der nechsten predigt haben wir gedacht des bleyes/ glantzs/ wismatt/ spießglaß und allerley falsch ding/ so neben den zwittern bricht/ oder darein die zwitter brechen. Weil wir nun hie beim silberschlacken/ kobelt/ kiß/ speise/ unnd was des wilden dings mehr ist/ erwehnen/ müssen wir jungen leuten hieuon auch ein kurtzen bericht thun/ weil zumal solches dienen wird zu erklerung unsers gleichnus.

Es haben die genge zu Davids zeyten/ auch nit lauter gedigen gold und silber gefüret/ sonst het man sie nit schmelzen/ oder siben mal durchs fewer gehehen lassen/ wie man auch kein zusetz gedürfft und von keinen Schlacken gewist hette. So werden auch alle genge/ nicht erz gefüret haben/ weil Jeremie am 6. der bösen oder falschen Beragarten unnd des thumen od verworffen ergs/ oder verbranten witterung gedacht witt. Drumb können wir in unser bergpostil/ die wilde arten nit aussen lassen.

Was nun den cobelt belanger/ den nennen grecken und lateiner cadmiæ lapidem, unnd theilen solche art inn natürlichen cobalt/ der in gengen/ fletze und stecken bricht/ und den man in schmeltz und seiger hütte machet. Diser ist one zweiffel am ersten den wunderten bekant gewesen/ welche aus den metallen und erzen vil wunderzney etwan gemacht haben.

Vom Cadmo dem alten und berhumbten schmelzer/ der aus Phœnicia oder Palestin in Greckenlandt kommen ist sol diese Bergkart den namen bekommen/ Wie ein an der Kur genant/ ein 128. theil einer zechen den namen sol geben haben/ wiewol andere diß wort Kukus vom Kuck herauf berfüren wöllen.

Denn dieser Cadmus wie Plinius schreibet/ hat beide die Buchstaben und das schmelzen in Europam gebracht/ und weil Phœnicia unnd das ganze gelobte landt/ den Grecken gegen morgen gelegen/ hat man in vom wort Kedem (welches der Ost heifset/ in der heyligen sprach) den morgen oder Osterlender genennet/ wie jr Bergkleut die schwager knappen/ und was aus der Gastein/ Rauriß/ fürst und stahlberg herein kommet/ die Oberlender nennet.

Man muß den Ertzuetern unnd Israheliten die ehre unnd vorzug lassen/ das sie viel treflichs dinges erfunden vor und nach der Sündflut von dannen die schönsten künste in ander land kommen sein/ Drumb haben die gifftigen arten in hütten unnd zechen/ jren namen vom Cadmo auch bekommen.

Denn die untern und obern offenbrüch und was sich im auge oder seyten für und rück wandt und im rauchfangt anleget/ butbley und kupffer- rauch/ das gekretz für dem ofen/ sampt dem staub so man im rauch gewelbe sehet/ und das flochgestub das fewer und gebleß uber sich stosset/ und wider herab fellet/ heisset in gemeine Cadmia fornacum, wiewol die fleyssigen erzte bey den Arabern und Grecken/ einer yeden art/ jren eygen namen geben/ entweder von dem ort da es sich anleget/ oder von der form unnd gestalt/ so es im schmelzen/ treib oder gatherde bekommet/ den etlichs zumal in kupffer und messighütten/ sol sehen wie ein schneck/ etlichs wie ein weintraub/ etlichs sol geferbt unnd gestreifft sein/ etlichs wie ein nagel am menschen finger/ etlichs sol wie wolle sehen oder spinnaweb so im herbst inn der lufft fliegen. Etlichs sol sehen wie die Rukug ringlein an beumen/ das sie Tuciam nennen/ welches man in Apotecken braucht/ wie weiß unnd graw nicht/ welches die gelerten Onichitin, unnd die Deutschen nichts nennen/ so den augen gut ist.

Aber von diesen alten Hütten arten/ so etwan und noch uber den garherden/ und do man Messig macht und geust/ sol gefunden werden/ pflegen die erfarnen erzte zu reden. Inn unsern Hütten haben wir die untern und öbern ofenbrüch die sich an die seydtwenden anlegen/ wenn die zusetze den ertzen entgehen/ oder die erz mit zusetzen nicht recht und gebürlich temperirt und vermenget sein. Dise ofenbrüch halten noch silber und sehen wie ein cobelt der voller drüsen und in einer grossen witterung gebrochen ist.

Ombs aug leget sich auch ein gifitiger Hüttrauch ahn/ wie ubern treibherde/ welcher etwas weiffer ist/ Jtem an der rückwandt uber dem Ofen henget sich auch ein gelber rauch an/ so die erz viel wismats haben/ henget sich der selb an der forman im ofen. Was das gebleß/ und wenn die öfen zu liecht gehen uber sich stosset/ fangen etliche in rauchgewelben/ oder es fellet wider nider/ das neñen wir flock oder fluggestub/ helt auch silber.

Die gekretz und ofenasch/ so man ausser unnd inner dem ofen zusamen keret/ wollen die gelerten spodon nennen/ wie auch der zechrauch/ so offt neben den gengen/ und zumal wenn man inn gruben setzet/ mit diesein Greckischen wort genent wirdt.

Jhe Bergkleut nennet den weissen und spiegelten zechstein/ darein auff S. Annenbergk gern erz bricht/ ein spadt/ welches wort dem greckischen spodo sehr ehnlich ist/ und es kan wol sein/ weil spodos auch weiß ist/ das man unsern spadt gepulvert/ und für den spodon aufgeben hat/ Wie die alten erzen bein und kreuter gepulvert/ und anstadt des fluchgestubes/ gekretze und schmeltzasche etwan gebraucht haben.

Weil aber sölche hütten und ofenarten gemeiniglich vom Cobalt/ Kiß/ Wismat/ Bley/ Schweffel und Quecksilber/ so bey allen Bergkarten ist/ herkommen/ sind diese Cadmiæfornacum sehr geschwinde gifit/ damit man alte und fliessende scheden/ gleich wie mit nucht unnd roter silberglet aufdrücknet und beisset/ unnd der selben arten/ den leuten gar keine in leib gibet.

Wenn aber diese ofenarten wider durchs fewer gesetzt/ und jre gebürliche zusetz bekommen/ so nimmet der stein und bley das silber darvon das ander verzeret sich im fewer/ und wirdt endtlich zu schlacken/ daher sie vom Cobelt schwartz und graw/ von quartzen/ flössen und spadten glasig unnd offt auch durchsichtig werden/ wie ein duncel glaß/ so auß kislingstein/ sandt/ asche unnd salzkraut gemacht wirdt. Denn warm Schlacken und Glaß/ sind auch beide zech/ unnd lassen sich dehnen wie kleine feden.

Souiel zum bericht von unsern Hütten und Ofenarten/ die man Cadmias fornacum nennet.

Dieweil man aber gemeiniglich auff drucknen unnd vesten gengen/ auch solche schwartze/ glauche/ grawe oder ascherfarbe arth hawet/ darein offtmals gut Erz bricht/ und solch Metal in den starcken witterung verbrandt und auf gesogen werden/ wie die rechten ofenbruch/ hat man dieselbige art/ unnd was der gifitigen zechen rauch mehr sein/ auch Cadmias fossiles genennet/ jhr Bergkleut heißt es Cobelt/ die Deutschen nennen den schwarzen Teuffel/ und die alten teuffels Buren unnd Cadartin/ alte und schwartze Cobel/ die viehe und leuten mit jrer zauberey unnd gifit und gaben schaden thun.

Lunist der Teuffel ein böser und vergifiter geist/ der seine verlipte pfeil den leuten in jr hertzen scheust/ wie die Unhulden und Hexen viech und leute glieder schiessen/ beren und verlehmen/ und mit dem cobalt un hypomane oder pferdgifft viel unfugs stifften und Teuffeley treyben.

Denn nachdem Quecksilber und rotgültigem Erzt/ ist cobalt und wismatrauch das gifitigst metal/ damit man auch fliegen/ grillen/ meust vihe/ vogel und leut sterben kan. So frist Cobalt und kißwasser den heuern bende und füsse auff/ und der staub unnd rauch vom Cobalt sterbet viel Bergkleut unnd Erztscheider/ wie der Hütt unnd Bleyrauch viel schmelzer und abtreiber verlehmer und umbbringet. Es hab aber nun der Teuffel oder seine Hellraumen oder Drutten/ dem Cobelt/ oder den kobelt/ den zeuberin den namen geben/ so ist cobelt ein gifitig und schedlich metal/ es halte silber oder nicht.

Ich finde 1. Regum 9. ein wort/ das heißt Cabul, Denn do Salomoh dem Könige zu Tyro zweinzig Stedt in Galilea schenckete/ besihet sie Hyram/ und wil sie nicht haben/ und spricht das landt heift wol Cabul, wie es Josua am 19. getaufft hat. Nun ist das gewiß auf Josua/ das diese zweinzig stedte/ im stami Aser/ nicht fern von unser Sarepta gelegen/ und das an dem eysen und kupfferbergkwerck gewesen ist/ wie ir zur andern zeyt auf Mosis segen/ uber den stamm Aser gehöret habt.

Weil denn diese zweinzig flecken Bergstete gewesen/ und Cobelt ist ein Metal/ wolte es sich gerne ansehen lassen/ als solte die Bergkart jren namen vom land Cabul haben.

Die Jüden gehen viel mit Zauberey und Teuffelley umb/ unnd haben offt wasser und weide vergifften helffen/ drumb weil sie der Patriarchen Cabala und reine lehr vom Messia und seinem reich faren lassen/ müssen sie sich mit den Cobelt unnd jhrem Schambemperers behelffen/ Denn wer warheit und leben nicht leyden kan/ der muß mit lügen und mordt umbgehen sein lebenlang.

Die Historien und umbstende können den verstandt sehr wol leyden/ Hyram war ein treflicher unnd erfarner Bergman/ der auf Ophir viel goldt bekam/ damit er Salomonem verehrete/ Nun wolt sich der grosse König wider dankbar gegen seinem nachbarn erzeigen/ wie denn ein frommer nachbar ein starcke vestung ist/ drumb wiler ein bergkman mit Bergkstedten verehren.

Weil aber der König zu Tyro berguerstendig war/ und beritte zuuor das newe Bergkwerck/ unnd sahe das nur geringe Metall da brachen/ und viel wilder Cobeltgeng da aufgericht waren/ wiler mit den cobeltgengen und Erzen zufrieden sein/ und sein geldt lieber auff fündige gölt und silbergeng in India verbawen.

Denn war ists/ Cobeltgeng sind unartig/ und ist gemeinigklich seßbrauff/ so raubet er im fewer/ und madtet unnd frist viel Bley/ biß man die silber daruon bringt/ wenn erzumal speysig ist/ Drumb macht ihm Hyram gute Bergkleufftige rechnung/ und wil ich mit schweren gebeuen und ubziger unkost und hüttenkost nicht uberlegen/ unnd schencket Salomo seine zweinig Bergkstedt wider.

Der Hebreische text wolt schier gerne/ mit uns gar gut Deutsch reden/ das Landt heist wol Cobelertz/ drumb wil ich mit dem Coblichten und heißgretigen oder armen Erzt zufrieden sein.

Die ausleger mercken auch das es ein unartig landt sein muß/ drunũ helt es einer es sey ein sandicht und unfruchtbar Erdtreich gewesen/ Andere halten es für zehe lettig/ greusicht oder kyfricht landt.

Nun ist es war/ Cobelt ist ein zehes und heißgretig Metall/ gibt die silber ungern von sich/ raubet offt und verzeret die silber/ und macht die bley mat und musig/ das man alle stich außgiessen muß/ Wie Jeremias uber sein los oder Cobeltert auch klaget/ Jeremie am 6.

Ich mache Bergkleufftige rechnung/ und rede wie ein Bergkman bey Bergkleuten von zweinzig Bergkstedten/ welche Hyram und Josua bergkverstendige leut/ Cabul erectum selber nennen.

So jemand duncket diß sey zu scharff/ oder genaw gesucht/ der mag sich auff die Bergkfreyheit beruffen/ und an diesem ort ein newen schurff werffen oder rösch treiben/ trifft oder ubersetzet er was söners inn dem Gebirge/ so wil ich mich wie ein Bergkman weysen und bessers berichten lassen. Wie mich zwar newlich ein gelerter Bergkman des worts Cobelerinnert/ das bey den Hebreern ein Erdwachs heißt/ ob der Cobel sein namen daher hette.

Cobelt ist und bleibt dennoch gleichwol ein wildes unnd gifitiges metall/ das im bergt aufgesogen ist/ wie ein ofenbruch oder lere schlackel und hat seine drüsen/ die bißweilen voller schöner rotgültiger euglein stehen/ durchsichtig wie ein Rubin/ Bißweilen ist er also abgederret/ das er gleich zu schreiben gebrandt ist.

Ich hab ein solchen Cobeltscherben/ der sihet wie ein Hirnschal von aussen innwendig hat er seine cellen und kemmerlein wie ein Menschenhaubt/ und weil es von Quecksilber lauter gifit ist/ stirbt alles was darauß trincker/ daher wir es poculum mortis nennen.

Auffm Sonnewirbel bricht ein cobelt/ der lest sich anzünden/ und brent liechter loh wie ein Agstein/ biß sich der schwefel oder fettigkeit dran verzert und das Quecksilber verraucht/ darnach bleibt ein gifftiger spodos oder heuflein asche/ daraus man für die newen zeloten/ so umb unnötige und strembde sachen äfern und jren unzeytigen eyfer wider unschuldige und woluerdiente leut/ mit unuerstandt entbzinnen lassen und ausgeifern/ ein recht eyferwasser machen köndte/ wie auf dem staub im tabernackel/ wie man auch Habern im Cobelt seut/ und dem schedlichen gefügel fürstrewet.

The Bergleut/ jr wisset/ das jr hie auch cobelt stuffen gebrochen/ wenn man sie in stuben pochet und zuschlegt/ das ein sichtiger dunst und gifftiger rauch draus feret/ wie auf einem Menschen der an der ungnad stirbet/ der zeucht inn dem Gemach herumb wie ein Nebel/ oder so man ein groß unschlet liecht auflescht.

Ober solchen grawen/ schwarzen und glauchen Cobelt/ nennen die Glerten auch den Galmey/ so man in die Kupffer brennet/ wenn man Messig machen wil/ Cadmiam, Dis ist ein Zechstein darein Bleyerzt bricht/ ist gelblicht schier wie Schmielen oder Trippel/ bricht umb Cöln und Ach. Souiel von beiden Cobelten und Cadmijs.

Glockspeise so in gengen bricht und offt silber helt/ oder die auf den Erzen gemacht wird so auff spatgengen brechen/ ist auch Coblicht und heißgretig/ lest sich nicht gern auf dem ofen bringen. Nachm stich lagert sich die speyse im spoz zusamen/ do sie noch stein unnd silber bey sich hat/ madtet unnd taubet man sie durchs fewr/ wie jetzt die arbeit beide inn Zihn und Silberbergkwerck auffkommet/ das ubrige gibt Schlacken.

Spat und Quertz füren offt Goldt unnd Silber/ die machen die Schlacken weisser und durchsichtiger.

Wir müssen auch des Kiß gedencken/ der ist Meister im ofen/ wen man stein drauß macht/ und nimmet die silber zu sich/ und gibet sie dem Bley/ welches durch die rohe schicht daruon gebracht wirdt/ weil noch Schlacken Kiß bey sich haben/ so sind sie schwerer und geben Silber.

Sölchen Kiß nennen die Grecken Pyriten, drumb das er Fewer gibt/ wie ein Hornstein oder Fewrstein/ und das er schier ein Fewrfarb hat/ Aristoteles nennet in Pyromachum, das er sich im fewr weret/ und lesset sich nicht madten und uberweldigen und helt das silber/ auff das jm das fewr nicht schaden kan. Omb Tronach findt man stuffen Hasel und wellisch nuß groß/ drauf schleifft man bürenstein auff die zündbüren.

Die Deutschen heissen jn vielleicht Kiß/ das er so fest oder hart ist/ wie ein Kislingstein/ welche die Bergkleut Quertze nennen. Ich halt es Kiß sey ein verbrochen oder verkürzt wort/ vom Markasit, vor vom Kissit, oder endlich Kiß kommen ist wie Gret von Margaretha.

Es sind aber mancherley Kiß/ goldtgelbe/ diese sindt bißweilen fein gewürffelt oder vierecket und schön außpoliert/ offt achteckicht wie ein Chalcedonischer Pater noster stein/ Man hat auch gar ein runde kugel von Kiß bey uns gefunden/ die inwendig hohl war/ In Ungern bricht er gar schön unnd klar/ den dunckeln nennet man ein Ungerischen Gelff/ Die alten Chimisten bei nArabern haben in Marchalith genent/ vielleicht das er zur narung dienen solle/ wiewol es wenigen noch zur zeyt gerathen/ drumb jre kunst wol Algemist auff Liderlendisch genennet wirdt.

Sonst hat man Wasserkieß/ der ist weislich/ und Kupfferkiß/ der ist rötlicht/ Jtem grawen und schwarzen Kiß/ der sihet wie ein Eysenstein.

Ob aber wol der Kiß die Bergkleut offt ungewiß machet/ wie das Bergksprichwort laut/ dennoch bricht offt Goldt/ Silber/ Kupffer/ und Zihn drein.

Mir ist ein Kissstuff geschenckt/ auffm Schnebergk gebrochen/ ist vast einer spann hoch/ und arms dick/ unnd hat unten ein drüsen die gehet durchaus/ in der mitte ein absatz/ als wenn ein gebirg uberhengig ist. An dieser stuffen stehen biß in hundert Glaserz tröpflein/ lahn unnd Hanffkörner groß/ darein ich mir ein ölbergk von Glaserz hab schneyden lassen/ ist schön und wercklich zu sehen.

Diß Metall ist auch sehr gifitig/ wie die Kißwasser sehr ungesundt sein zu trincken/ und fressen oder beissen die leut auff/ wenn man drinne sincken muß. Wie auch der Brunn in Zipsen von einem Kisigen gang fliessen sol/ darinn Eysen zu Kupffer wirdt/ Wie man hernach ein solche Kißlauge hat machen lernen/ darin das Eysen gar zu emiem muß wirdt/ und endtlich Kupffer draus gemacht.

Es kommet jetzt ein new Kupfferwasser Bergkwerck auff/ im Kreiß Ellebogen/ da man auf Kiß ein sehr hochfarbich Vitriol seudet/ wie man zu Schachwitz auf Alaun erz auch Kupfferwasser machet. So sollen Kupfferwasser zu Goslar auch von kißgengen hertrieffen/ daher kupfferwasser ein Eysen kupfferichtt macht wie ein kißlaug/ unnd frist in das Eysen hinein/ drumb/ man es auch zum Ezen brauchet.

Souiel hab ich von etlichen Bergkarten reden wöllen/ darein offt goldt und silber bricht/ und der man zum Erzschmelzen unnd scheyden nicht geradten kan/ daraus doch endtlich die Schlacken werden.

Ich hab aber oben gemeldt/ weil die Schlacken noch silberstein bey sich haben/ left man sie wider durch den ofen/ mit dem offen ausgeben/ oder man pocht und melet sie so lang/ und arbeit sie uber die rohe schicht biß man den stein gar daruon bringt/ darnach dienen sie zu nichts mehr/ denn das man sie bißweilen den Ertzen zusetzt/ damit sie deste ehe fliessen/ Endtlich aber werden sie wegkgestürzt/ wie der Prophet David singet/ oder wie im vorigen verf stehet/ in wege gestürzt/ das yederman mit füssen drüber lauffe.

In diese Metallosen und aufgepauschte schlacken/ schreibet der heylige Geist euch Bergkleuten abermals ein rechte Bergkpostill/ und malet die Gottlosen sehr wercklich abe/ mit jrem Gottlosen und ungerechten wesen/ und wann doch solche Gottlose leut herkommen/ und wie es einen ausgang mit jnen gewinnen werde.

Ein Schlack ist ein loses/ leres/ vergebens Metal/ oder unflat/ darinn nichts gutes mehr ist/ Also ein gottloß Mensch/ oder zwar auch ein Gottlose Stadt unnd Landt/ ist ein rechte tawbe oder aufgepauschte schlacke/ darinn nichts gutes mehr von Got/ seinem wort/ und geist ist.

Denn das heissen eygentlich in der heyligen Schrifft/ unnd bey vernünfiftigen hertzen/ lose leute/ die sich lose gürten/ darinn kein guter tropffen mehr ist von Gott/ glauben/ ehre und warheit.

. . .