Hammerschmid 1723

Johannes Florianus Hammerschmid, Prodromus Gloriæ Pragenæ, Continens Urbinum Pragenarum Fundationes, Pragensium à Fide Christi suscepta Religionis Catholicæ Fervores, pro Fide Christiana perpessa Martyria, Fidei Christianæ Propagationem, Ecclesiarum Pragæ Erectiones, Monasteriorum Fundationes, Xenodoechiorum Dotationes, Castri Pragensis, & Wissehradensis Descriptiones, Archi-Episcoporum Pragensium Titulos, Divitias, Potentiam, Ditiones, Bona, Dignitate, & Nobilitate, Nobilium Domos & Palatia, Universitatis Carolinæ Magnificentiam, Regum, & Imperatorum erga illam Amores, Privilegiorum Confirmationes, Tri-urbis Curiarum, Pontis, & Turrium Descriptiones…, Vetero-Pragæ [Wolfgang Wickhart] 1723.

s. p.

PRÆFATIO
In Prodromum Gloriæ Pragenæ
Regni Bohemiæ Metropolis.

. . .

Julius Cæsar Scaliger
in urbibus, Tit. Praga.

Septa metallifero circum quæ Monte superbis,
Hercynicæ in medio Martia Praga sinu!
Linque aliis populis tantæ munimina sedis,
Qui nequeant armis jura tenere loci; 
Namque tuum est, non præsidiô turgere locorum,
Sed loca præsidiis fidere posse tuis.

Nullus versiculus inanis aut cassus! Metalliferum Montem, aut Cuttnam argenti fodinis nobilem, aut Gilovienses auri venas (utræque non multis à Praga distant milliaribus) aut marmora, aut latomias (quas etiam Metalli nomine comprehendere veteres sunt soliti) intelligit, quarum ponè Pragam, meridiem versùs, stant Montes maximi; sic ut non uni adhuc Pragæ, sed pluribus condendis sufficere possint. Neque ego sanè urbem, in his Regionibus novi, cui ad ædificandum tanta facultas suppetat: lapides, marmoribus nihil cessuri, Calx prorsus lactea, bitumnosa, támque facilè, & firmiter lapides apprehensura, ut Calx Pragensis (quod ab Italis accepi) etiam in Italia, proverbiô celebretur; Arenam subigendo cæmento maximè idoneam, ex fundo fluminis Moldavæ petunt, qui mediam urbem intersecat; sylvarum cæduarum, & omnis generis arborum benignissima ubique circùm Pragam materia; plura alia memorabunt Architectones nostri Pragenses.