Frönsberger 1564

Leonhart Frönsperger, Bauw Ordnung. Von Burgen und Nachbarlichen Gebeuwen/ in Stetten/ Merckten/ Flecken/ Dörffern/ und auff dem Land/ sampt derselbigen anhangenden Handwercker kosten/ gebrauch und gerechtigkeit/ in drey Theil verfaßt und zusammen gezogen/ welches Innhalt nach der Vorred weiter auff das aller kürtzest zu vernemmen ist. Allen Oberkeiten und Underthanen nütz und dienstlich zu gebrauchen/ Vormals in Druck nie außgangen/ &c., Franckfurt am Mayn [Georg Rabe – Weygand Hanen Erben] 1564.

Ander Theil.

. . .

fol. LX^v–LXII^r

Von Kalckhütten und Öfen.

IIII. Cap.

Wie man zu den Gebeuw strassen/ weg/ steg umb gelt schuldig ist zu erlauben/ also ist man auch schuldig vonn eines andern gut kalck/ stein/ sand, zu brennen/ brechen/ unnd graben besonder so solches gemeinen nutz befördert, denn solches der gebeuw ein anhangende notturfftige gerechtigkeit zu den oder der haußheblichen bewonung ist, der ursach solche dienste wenn mans sonst nit bekommen kann/ einem jeden schuldig ist umb zimliche bezalung/ mit zutheilen/ gleich wie im vordern Capit. Von den gebrannten gebacken Zigel und stein angezeigt/ also sol es auch mit dem kalck vernommen werden/ daß bey allen und neben Zigelhütten auch Kalcköfen/ verordnet werden/ die in zimlicher grösse/ ungefehrlich der einer ander lenge unnd breite zwentzig/ mehr oder minder/ schuch/ und in die viertzig schuch tieff oder hoch sein sol/ je höher je besser die sein/ auch am erschützlichsten zu heitzen/ wo das feuwr nahe beysamen gehalten wirt, zu solchen wirt und sol auch ein gemein maß als Scheffel oder Züber jedes ort und statt gehalten werden/ in gleichem kauff/ welcher nach dem brannt auch durch die verordneten darzu besichtiget/ ob der kalck genug wol/ unnd recht gebrannt/wo fehl oder mangel daran erfunden worden/ dieselbigen nach billgkeit abschetzen/ denn was für gruben ein jeder in seinem erkaufften kalck findet/ die sol der Zigler oder kalckbrenner schüldig sein wider zu nemmen/ und das mit gutem kalck wider erstatten/ Zu solchen mag an jedem ort nach billichen dingen zu jeder gattung Taxt und zalung gemacht werden/ wie es von den Ziglern zu kauffen sey/ und höher nit bezalt sol werden/ und was denn förterhin weiter zu guter Zigel und kalck ordnung gehört/ nach jedes land oder Statt gelegenheit angericht sol unnd mag werden. In sonderheit ist bey uns Teutschen der kalck so von weisen Kißlingstein gebrannt/ zu den rauchen unnd glatten mauren/ zum bestechen und verbinden/ für den besten und nützlichsten geacht/ denn je herter der stein/ je nützlicher der kalck/ ist aber der stein senfft/ lück/ so wirt der brannt mürb/ solcher ist zu dem bestechen und verwerffen oder dünchen am dienstlichsten/ so aber der kalck abgelescht/ wirt er solcher gestalt zum gemeur und merckel vermischt und genommen/ da sol man zu allem kalck so von weiß geferbten Kalcksteinen gebrennt wirdt/ doch wie man solchen jeder land art am besten gehaben mag/ und in ableschung oder anrührung solcher speiß alle wegen zu dem wenigsten zu eim theil kalck zwey theil sand nemmen/ damit der gezeug nit zu feist/ fett oder mager werde/ aber der kalck an vielen orten theur/ und nit wol zu bekommen ist/ so nimpt man deß sands weit mehr/ doch nach dem es die die arbeit erleiden mag/ darvon hernach weiter vernommen sol werden/ wo aber es gegraben wald/ oder feldt/ sand/ als zu den groben oder rauchen gemeuwr vorhaben des gebrauchs würd/ daß man drey oder mehr theil sand zu eim theil kalck pflegt zu nemmen/ ist es aber was reiner gemeur/ und were solches fliessend oder wasser sand/ so ist fast/ wie oben/ die theilung mit sand unnd kalck zu nemmen/ es were denn daß solches gemeur bestochen oder getüncht solt werden/ so wirdt zu glattem sand zu zwen nur ein theil kalck wie oben gehört/ genommen/ auch wol etwan halb kalck und sand genomen/ und was von kalck und sand gemaurt/ das sol auch nit bey grosser kelte geschehen/ die weil der sand an jm selbst von kalter natur ist. Derhalben zu besserm verstand/ ob man aber ungebrannt stein und sand zusammen vermischt/ ehe das auß stein kalck gebrannt/ so mag solches in keim gemeuwr verharten/ so aber der stein durch die grosse hitze und und feuwr im ofen gebrannt/ dardurch deß steins hertigkeit verloren wirt/ und jm sein krafft also entzogen/ der urfachen er auch lück und mürb wirt/ und auch alle feuchtigkeit/ so im stein ist/ durch deß ofens hitz herauß gezogen/ sampt der lüfftigkeit der massen verzert/ aber die verborgene krafft und hitz deß brannts ist noch im stein/ so man den ins wasser stöst/ empfecht er erst hitzigen gewalt ehe denn die feuchtigkeit hinein dringt/ so bricht er auff und wirdt entzünd/ so er nach solchem erkaltet/ so ist erst sein natürliche hitz darauß getrieben/ Derwegen die gebrannten kalckstein in jrem ersten gewicht/ als man sie in ofen thut/ und mans wider herauß nimpt/ nicht mehr so schwer halten oder befunden werden/ ob solcher stein wol sein voriger gleiche und grösse hat/ behelt er doch den drittheil weniger am gewicht/ darumb durch dürre/ lückhitzigkeit fassen sie die vermischung deß sandes an sich/ daß durch die zergangene hitz deß feuchten kalten sands wider ein hertigkeit darauß wirt/ dem denn weder hitz/ kelte noch anderß ungewitter/ schaden kan/ noch wirt auff ecliche ander weg als von daucht/ dufft/ und schwamen pinsen/ auch weiter von groben rauchen stein/ kalck gebrannt/ welches theilung mit dem sand ist fast wie oben gehört oder vernommen worden.