Johannes, rex Bohemiae 1328

John of Luxembourg, Privilege for Lime Quarrying Granted to the Old Town of Prague, Prague 1328, in: Prague Municipal Archive, Prague.1

Text of the charter by which King John of Luxembourg of Bohemia, in December 1328, granted the Old Town of Prague the right to quarry limestone one mile of the city and to burn it into lime for building purposes.

Nos Johannes dei gracia Boemie et Polonie rex ac Lucemburgensis comes. Ad universorum tam presencium quam futurorum volumus noticiam pervenire, quod nos Maioris civitatis nostre Pragensis et incolarum ipsius condicionem cupientes facere et fieri meliorem, fidem et devocionis constanciam civium ipsorum, quam semper gesserunt hactenus et adhuc erga nostram gerunt celsitudinem, attenta mentis consideracione pensantes, ut civitas ipsa in edificiis emendari valeat, eo melius et amplius decorari, omnes et singulas calcis et aliorum muralium lapidum quorumcunque rupturas, foveas quoque argillarum et harenarum pro structuris faciendis necessariarum, ubicunque infra distanciam ad unum miliare ab ipsa civitate inveniantur aut invente fuerint in bonis nostris, baronum, nobilium, wladiconum, abbatum, prepositorum, canonicorum, clericorum, religiosorum quorumcunque aut eciam civium, ipsis civibus Pragensibus, qui nunc sunt aut eorum successoribus, in perpetuum de munificencia et liberalitate regia libere damus, conferimus et donamus, inhibentes nostre gracie sub obtentu omnibus et singulis, ad quos presentes aut eorum noticia pervenerint cuiuscumque condicionis, dignitatis, status vel preeminencie fuerint, ne a supradictis ciuibus pro lapidibus muralibus aut calcis, argilla seu arena fodiendis aut recipiendis precium aliquod presumant perpetuis in antea temporibus exigere vel aliquo modo extorquere. In cuius rei testimonium presentes litteras fieri et sigillo nostro maiori fecimus communiri. Datum Prage anno domini mcccxxviii°, kalendis Decembris.

  1. Quoted from: Jaromír Čelakovský (ed.), Sbírka pramenů práva městského království českého I (Privilegia měst pražských), Praha 1886, s. 30–31, No. 15. Cf. Josephus Emler (ed.), Regesta Diplomatica nec non Epistolaria Bohemiae et Moraviae III (Annorum 1311–1333), Pragae 1890, p. 590, No. 1511. ↩︎